18November2018

gerenzanoforum.it

La piazza di Gerenzano dal 2002

You are here: Home Storie Dialetto I nostar campan

I nostar campan

Paisan, mett gio’ la ranza, l’e’ mesdi’,
e sponta sul santee la piscinina,
ca la vegn, 'ma l'e custumm, quasi tucc i di’
a purtatt chi ul mangia’, in du la ramina.

Sona i campann! ...Fa a uregia ul segn da crus
e, a l'ombra dul muron, setas a pus.

E taca a sbrudula cunt ul cugiaa
la supa gialda ca la ta segola...
e leppa su i barbis tucc maseraa,
ca sann da pan da mej e da scigola,
poeu dagh 'na rugada al cancanin,
e cerca da schiscia un pisulin.
 
Dastendas gio’, quacc, quacc...e poggia ul coo
al tronch dul tu muron...visin ai radis,
poeu slonga foeura i oss... tripirla un poo,
e li’ mezz indurment, cui oeucc tobis,
rimira ul tu bel camp e la campagna
ca la sa dastend dal pian a la muntagna.
 
Campagna da Milan, vers la Brianza…
o tera di me vecc... tera d'amur,
lustra da verd e piena da bundanza,
coeur dul me coeur... amur... fiur dul me fiur,
mi’ ta partegni tutt, ti ta seet mia,
par ti’ moeuri d'amur. ..da gelusia!
 
L’e’ bela la campagna du la bassa...
D’invernu specialment, quand la marscida
la suda verd, sota la nebbia grassa
perduda in la pianura un puu sbiavida.....
L’e’ bela, quand la dorma in santa pas
fassada in la scighera da bumbas...
 
Bej i filar da saras e i pobbiett
ca piangian tucc stremii sura ul padumm...
bell ul fuma’ di foss e di rungett,
l’e’ bela anca la mota dul rud ca la suda fumm
sul praa….visin a na manza bianca e nera
ca la mastega ul fumm e la scighera...
 
Bell ul silenzi grev di to giurnad,
cun quej frecass che fann malincunia….
ul son d’un vertical... do sciuppettad...
ul frrr d’un quaj sgneppin ca salta via...
un culp ai ass, che vegn da un giugh di bocc...
e i ur, ca sonan dulz, a un urelocc...
 
Bela la sira, quand la va a durmi’
pus a la nebbia ca la ga fa da tendina...
bej i nuttad tucc gris, ca scalzan ul di’...
bela l’alba ca spunta a la matina,
cun la sciguetta che sgarbia la lengua,
in du la nocc che man man la sa daslengua...
 
ma pussee bela ti’, la mia Brianza,
cul tu su e l'or di tu mesdi’...
cui tramont da foeugh... e l'eleganza
di tu giarditt , ca paran metuu li’,
di tu casadd... cui vill... sui culinett,
par fa tucc un presepi da casett.
 
Dorma, paisan, felice ti... anca tropp!
Par nun du la cittaa non gh'e 'legria...
nun gh'emm tucc quel ca voeurum...ma, purtropp,
l’e’ nostar viv che me s'cervella via...
Par ti l'aria, la vita, la natura...
par nun ul rema’ in mezz a la bruttura.
 
Par ti’, la festa e i sandalinn al vent,
cun la spusotta stagna in pompardina
cun 'dree dudas fioeu macarunent
che gratta in coo e sa pissa in la vestina...
par nun, la vita grama in la cuntrada,
che, se anca la par bela, l’e’ trasada.
 
E, quand ta toccara’ strappa’ i radis
e anda’ in dul mond da la’, cui puaritt,
ta mandarann, magari, in paradis
a sumena’ ‘l furment par i angiaritt ...
visin a la  Madona. ..tantu bona. ..
che pur sa ta set un paisan, la ta perdona!
 
Nun duaremm passa’ in dul gran sedass
che tucc al cribbia e tucc al paragona...
Ti, non ta gh'avarett che presentass
Cun la. ranza in spalla ..insci’, a la bona,
par vess trattaa, su’ in ciel, cume un amis
e vegh sbarettaa i port dul paradis.
 
Dorma, o paisan, e ronfa... e dagh adree...
poeu... ranza e vanga...e sgobba tutt ul di’,
par ricalca’, a la. sira, ul tu santee...
turna a la tua cassina e anda’ e, durmi’...
cul lissigneu che canta ul so’ sturnell
in du la nocc, prepuntada da stell...
 
Dorma, o paisan... riposa!... La tusetta
la sfoeuja, in mezz al praa  'ne. margherita...
I puj, cobbjaa sui stangh du la caretta,
pensan sul goss ai casi du la vita...
e canta la scigara, in la rubina,
cul gri... gri... gri di grij, sota in surdina...
 
Spicca, sul ciel tutt bleu di to campagn,
e se prufila netta, in d'una gloria
da su... quella filera da muntagn,
che fin da fioeu cunusum a memoria...
Brunaa... i do’ Grign... Mont Bar in d'un canton...
e in fond, ul gran zig, zag, dul Resegon!

Giovanni Barrella

Scelta per noi da Mario Carnelli