23April2017

gerenzanoforum.it

La piazza di Gerenzano dal 2002

You are here: Home Storie Dialetto La Colazion (Carlo Porta)

La Colazion (Carlo Porta)

FRAMMENT

Oh don Peder! - Oh el mè don Romuald!

Come stal? - Stoo benissem mì; e lù? -

Discretament anca mì. - Sentel stoo cald? -

Marcadetta se'l senti! no en poss pù;

Rivi adess de l'offizi a Sant Caloss

E sont bagnaa che pari staa in d'on foss.

 

- La, donch, che'l vegna chì se l'è sudaa.

Chì, chì lontan de l'aria, el mè don Peder -

Grazie tant! - Hal giamò cicolattaa? -

No signor, hoo bevuu on agher de zeder

Con dent on para de bescott del gerlo -

Mo bravo lù! la colazion del merlo!

 

Bottega!....el cicolatt! - El fa bell dì,

Don Romuald, a scoeudes i caprizzi:

Lù el guadagna, lù el va de chì e de lì,

Ogni bott lù el pelucca on quai offizzi;

Ma mì, con quella messa di des or,

Hoo pari a sbatt, no me capponi on bor.

 

Carlo Porta